Rå mango 'ostekake'

God rå kake! Frisk og syrleg som ei ostekake skal være. Her vart den bursdagskake. Oppskrift her.

Tips: Eg mel fyrst nøttene fint i foodprocessor, så har eg oppi mango, og til slutt det andre. Dette fordi det er lettare å få ein fin konsistens slik.

Super morgonsmoothie

Ein god start på dagen!

I denne boka fekk eg mange gode tips om korleis starte dagen best mogeleg. Kroppen rensar ut på natta og fram til kl 12 på dagen. Då er det viktig å ikkje belaste den med å ete mat som er tungt å fordøye og har lite næring, som gluten, melk og sukker.

Start dagen med nokre djupe innpust, medan du endå ligg i senga, slik at kroppen får tid til å vakne. Drikk eit par glas lunka vatn før du et noko anna, for å skylle kroppen. Ta gjerne saft frå ei halv sitron oppi. Dette løyser opp slim og er basedannande. Alt dette hjelper deg i å bli kvitt avfallsstoff og bli meir basisk. Jo djupare pust, jo meir syre ut.

Me har i fleire månadar ete ein grøn smoothie til frukost. Då får kroppen energi til utrensing samtidig som den ikkje brukar mykje energi på fordøying. Den blir aldri lik frå dag til dag, men her er ein me stadig vender tilbake til. Mine søner på 1 og 2 1/2 år elskar smoothie, så det er ein enkel måte å få i dei grønsaker, oljer og c-vitamin på! Oppskrift nok til to voksne og to små (ein glupsk liten som gjerne et meir enn oss voksne). Oppskrift inspirert av grøn smoothie i same bok som nemd over.

Lag den tjukk og luftig, så blir det mindre søl når små born skal ete.

Lag fyrst juice av:
3 epler
1 stilk stangselleri
1/2 agurk
3 cm ingefær

Hell den i ein blender og tilsett:
1 avokado
1 frosen banan
ein stor neve spinat eller ein stor kvist grønkål
1 ss Best of Greens
8 stk Amla-C tablettar
1 ss Rice Bran
1 ss Activated Barley
(desse fire siste kan sløyfast, men dei mangedoblar næringsverdien!)
Blend godt.

Ha i 3 ss extra virgine kokosolje
Blend til klumpar er borte.

Rør så inn med skei 4 ss olje (Udo's choice, Linfrøolje eller tilsvarande), 1 ss AloeVera og eit par ss chiafrø.


Server med hampfrø og gojibær. Gjerne også mulbær og litt raspa kokos.

Mango med supermat

Enkel og deilig dessert! Du treng

1 mango
blåbær
gojibær
yaconsirup
riven kokos

Ha frukt og bær på ein tallerken. Hell over eit par ss yaconsirup og litt kokos. Server saman med kokosis.
Yaconsirup er probiotisk (gode bakteriar for tarmane) og smakar som mild karamellsaus!

Tørka eple

Godt og sunt snop!
Etter å ha vore på besøk hjå farmor som hadde laga tørka eple, ville eg prøve sjølv.
Fjern kjernehuset, skjær epler i tynne skiver med ostehøvel eller kniv.
Tørk i ovnen på ca 40 grader (for at dei skal være rå og ha mest mogeleg næring!), varmluft. Slepp ut fukt av og til.
Eg brukte ca 6 timar.

"Ris" av røtter

Dette er eit godt alternativ til ris. Denne gongen brukte eg pastinakk og sellerirot, men du kan og bruke blomkål, jordskokk (bør helst blandast med noko anna), brokkoli eller andre røtter. Eg har planar om å prøve søtpotet saman med jordskokk.
Denne "risen" er rå og difor full av enzymer som hjelper magen din å fordøye. Enzymer forsvinn om maten varmast opp over ca 40 grader. Det er lurt å ha ein rå rett til middag, spesielt om du skal ete kjøtt.

1 pastinakk
1/2 sellerirot

Køyr i foodprocessor til det liknar ris.
Smak til med sitronsaft, havsalt (eller tamari), pepper, og ha gjerne i ca 1 ss tahini (sesamsmør) - då får du konsistensen som ris har.
Eg har og hatt oppi litt paprika, løk, tomat, spira bønner og urter. For å gjere den meir mettande kan du ha oppi spirer, solsikkekjerner, hakka valnøtter eller andre nøtter/frø. Eg heller over ca 5 ss med olje når alt er blanda saman.

Dette er og super barnemat. Men då utan så mykje krydder til dei aller minste.